Nýja skólaárið 2015-2016 er nú farið vel af stað. Hljóðfærakennslan hófst mánudaginn 31. ágúst og tónfræðakennslan mun hefjast 14. september.
Enn er hægt að innrita örfáa 8-10 ára nemendur á eftirfarandi hljóðfæri: píanó, selló , fiðlu, klarinett og saxófón. Forskóladeildir skólans eru nánast fullskipaðar. Samt er enn hægt að innrita einn 6 ára nemanda í Forskóla I og tvo 7 ára nemendur í Forskóla II. Ef ætlunin er að innrita nemanda þarf fyrst að skrá hann inn á Rafræna Reykjavík og hafa Tónmenntaskólann sem fyrsta val.
Fljótlega verður sent út fyrra fréttabréf skólaársins. Þar koma fram ýmsar gagnlegar upplýsingar fyrir foreldra nemenda. Þar kemur einnig fram skóladagatalið 2015-2016 sem er að sjálfsögðu einnig inn á heimasíðunni.
Helstu viðburðir á haustönninni eru aðventutónleikar í nóvember og jólatónleikar í Bústaðakirkju í desember.
Að síðustu má minna á að haustfrí er í skólanum eins og í flestum grunnskólum borgarinnar. Það er dagana 23., 26. og 27. október. Svo er bara að vona að veikindi herji sem minnst á nemendur og kennara og að allir fái sem mest út úr haustönninni.
Bestu kveðjur
Skólastjóri
