Í Tónmenntaskóla Reykjavíkur eru laus örfá pláss í Miðstöðina.
Miðstöðin er sameiginleg rytmadeild Tónmenntaskóla Reykjavíkur, Nýja tónlistarskólans og Tónlistarskólans í Grafarvogi.
Deildinni er ætlað að koma til móts við áhugasvið þeirra nemenda sem vilja stunda tónlistarnám af kappi en hafa meiri áhuga á námi í popptónlist en hefðbundnu klassísku tónlistarnámi.
Kennt er eftir rytmískri aðalnámskrá tónlistarskólanna og er mikil áhersla lögð á samspil í deildinni. Allir nemendur Miðstöðvarinnar fá bæði einkatíma og samspilstíma, en nemendur eru einnig hvattir til að mæta sem gestir í einkatíma félaga sinna í þeim samspilsverkefnum sem þeir eru í.
Á undanförnum árum hefur Miðstöðin staðið fyrir fjölda útitónleika á götum Reykjavíkur og nágrannasveitarfélaga í samstarfi við sveitarfélögin. Nemendur hennar hafa tekið þátt í ýmsum keppnum svo sem Músíktilraunum og Nótunni og nefna má að hljómsveitir á vegum deildarinnar hafa unnið Jólalagakeppni Rásar 2 þrívegis.
Hljómsveitir deildarinnar hafa einnig leikið á útitónleikum erlendis í samstarfi við bæði Kaupmannahafnarborg og Berlínarborg. Verkefni tengd deildinni hafa auk þess tvívegis hlotið Erasmus+ styrki á vegum Evrópusambandsins til samstarfs við nemendur í öðrum löndum.
Um 20 nemendur eru nú í hljómsveitarstarfi á vegum deildarinnar í fjórum hljómsveitum.
Nefna má að ein hljómsveitin sem starfar innan Miðstöðvarinnar og er skipuð 15-16 ára ungmennum leikur nú á vikulegum klukkustundar tónleikum flesta fimmtudaga á Hressingarskálanum oft fyrir fullu húsi.
Hægt er að sjá verkefni á vegum deildarinnar á youtube undir „miðstöðin“.
Áhugasamir vinsamlegast sækið um (merkið við rytmadeild) í gegnum Rafræna Reykjavík fyrir 9.janúar 2019. Umsækjendur verða að vera fæddir 2007 eða fyrr. Umsækjendur sem hafa tónlistarnám að baki, á hvaða hljóðfæri sem er, ganga fyrir.
