Skólaárið 2019-2020 fer vel af stað en þetta er sextugasta og áttunda starfsár Tónmenntaskóla Reykjavíkur.
Í skólanum eru rúmlega 170 nemendur og við hann starfa 20 kennarar, auk skólaritara, tveggja húsvarða og skólastjóra.

Hagnýtar upplýsingar

Skrifstofa skólans er opin kl.13:00 – 16:00 alla virka daga.
Viðtalstími skólastjóra er eftir samkomulagi.

Sími Tónmenntaskólans er 562-8477. Símsvari tekur við skilaboðum utan skrifstofutíma. Þess er óskað að fjarvistir nemenda og ástæður fyrir þeim, séu tilkynntar samdægurs í síma 562-8477 á skrifstofu skólans (einnig í símasvara fyrir hádegi), með tölvupósti tms@tonmenntaskoli.is eða í gegnum nemendanetið (School Archive).

Heimasíða skólans er www.tonmenntaskoli.is og svo er skólinn líka á Facebook, www.facebook.com/tonmenntaskoli

Kennsluheimsóknir og hlutverk foreldra.

Gert er ráð fyrir foreldraheimsóknum í hóptíma forskóladeilda fyrir áramót og í hóptíma 1. og 2. bekkja í janúar. Í þessum heimsóknum gefst foreldrum kostur á að fylgjast með námi barna sinna og ræða við kennarana um uppbyggingu námsins og markmið kennslunnar.

Foreldrar eru ávallt velkomnir að heimsækja kennslustundir í hlóðfæratímum barna sinna og hvetjum við foreldra eindregið til þess að mæta af og til. Þannig kynnast þeir þeim vinnubrögðum sem kennarar leggja áherslu á. Það er gífurlega mikilvægt að foreldrar séu góð fyrirmynd, skapi jákvætt umhverfi heima fyrir og gefi sér tíma til að hlusta á barn sitt spila heima og sýni þannig stuðning sinn við námið í verki.  

Vinsamlegast athugið að við biðjum foreldra, sem koma inn í tíma að sitja ekki í símunum sínum, heldur fylgjast með því sem barnið er að gera.

Foreldrafélag Tónmenntaskóla Reykjavíkur 

Aðalfundur Foreldrafélags Tónmenntaskóla Reykjavíkur var haldinn 9. október. Ágætis mæting var á fundinn. Eftirfarandi foreldrar voru kosnir í stjórn:

Elísabet Eggertsdóttir
Hrafnhildur Karla Jónsdóttir
Inga Hrönn Hasler
Ingólfur Sveinn Ingólfsson
Klemens Ólafur Þrastarson

Við þökkum þeim innilega fyrir að taka starfið að sér og hlökkum til að vinna með þeim næsta árið að því að efla samskipti nemenda og gera námið í Tónmenntaskólanum enn líflegra. Netfang foreldrafélagsins er foreldrafelag@tonmenntaskoli.is og svo er það einnig með síðu á facebook.

Haustfrí verður í Tónmenntaskólanum dagana 24. – 28. október að báðum dögum meðtöldum.

Tónleikar og samspil

Hátt í 20 tónleikar og samspil verða í skólanum á haustönn. Þeir verða í skólanum á sal (stofu 1), sjö tónleikar laugardaginn 9.nóvember, frá kl.10:30 og svo á klukkutíma fresti til kl.17:30. Önnur eins hryna verður laugardaginn 16. nóvember á sama tíma. Á þessum tónleikum munu allir nemendur skólans fá tækifæri til að koma fram og bjóða sínu fólki að koma og hlusta. Því biðjum við foreldra um að taka þessa daga strax frá.

Auk tónleika verða samspilsæfingar á sal, reglulega yfir önnina.  Samspilin eru hugsuð sem aukaæfing fyrir nemendur í að koma fram fyrir hvorn annan, þar sem kannski ekki alveg eins margir áheyrendur eru til staðar og andrúmsloftið örlítið afslappaðra en á stórum tónleikum. Samspilin eru því aðeins fyrir nemendur og ekki ætlast til að aðstandendur komi að hlusta þar (nema með mjög ungum nemendum).  Kennarar ákveða hver spilar á samspili og hvenær.

Hljómsveitartónleikar sameiginlegra hljómsveita Tónmenntaskólans og Tónskóla Sigursveins verða haldnir 23. nóvember í Seltjarnarneskirkju kl. 14 og kl. 16.

Jólatónleikar skólans verða svo haldnir í Bústaðarkirkju laugardaginn 7. desember kl. 14. Þar verður áhersla lögð á jólalög, að sjálfsögðu, hverskonar samspil og skemmtilegheit svo takið endilega daginn frá ☺

Jólavika

Í síðustu kennsluviku fyrir jól, 9.-13.des, verður jólavikan okkar. Þá brjótum við upp kennsluna og í stað þess að kenna eftir stundaskrá  munum við nota dagana til að fara út í bæ, spila tónlist í litlum samspilshópum og höldum jólasamspil í skólanum.

Því langar okkur til að biðla til foreldra, ef einhver vinnur t.d. á elliheimili, leikskóla eða vinnur hjá fyrirtæki sem myndi vilja fá hóp í heimsókn, að láta okkur endilega vita. Það er auðveldara ef píanó er á staðnum en ekki nauðsynlegt. 

Það er stór hluti af náminu að æfa framkomu og um að gera að leyfa krökkunum að gera það í jafn þakklátu umhverfi og svona heimsóknir bjóða upp á.

Verðmæti

Brýnið fyrir börnum ykkar að skilja aldrei eftir verðmæti í vösum yfirhafna. Vinsamlega athugið að skólinn tekur ekki ábyrgð á yfirhöfnum, skóm eða öðrum verðmætum.

Gott er að merkja skófatnað og yfirhafnir nemenda vel svo ekki komi til ruglings.

Nótnakaup

Hljóðfæranemendur kaupa nótur í mismiklu magni (eintökum) yfir veturinn og rétt er að benda á að óheimilt er að ljósrita nótur vegna höfundarréttarlaga og útgáfuréttar. Það er líka nauðsynlegt og skemmtilegt fyrir nemendur að eignast smá saman nótnasafn fyrir sitt hljóðfæri.

Skóladagatal Haust 2019

OKTÓBER
7. mán Samspil kl.18 á sal
22. þri Samspil kl.18 á sal
24. fim – 28. mán Haustfrí, báðir dagar meðtaldir

NÓVEMBER
9. lau Tónleikar á sal (allan daginn)
16. lau Tónleikar á sal (allan daginn)
23. lau Hljómsveitartónleikar í Seltjarnarneskirkju kl. 14 og 16
25. mán Samspil kl.18 á sal
27. mið Áfangapróf
29. fös Áfangapróf

DESEMBER
6. föstudagur Síðasti kennsludagur tónfræðinnar fyrir jól
7. lau Jólatónleikar í Bústaðakirkju kl.14
9. mán -13. föst Jólasamspils vika
13. föstudagur Síðasti kennsludagur hljóðfærakennslunnar fyrir jól
16. mán Jólaleyfi hefst

JANÚAR
6. mán Kennsla hefst eftir jólaleyfi
30. fim Samspil kl.18 á sal