Tónleikar og samspil

Á hverjum vetri eru haldnir um 25 tónleikar á vegum Tónmenntaskólans.  Þó þessir viðburðir séu ekki metnir formlega má þarna heyra og sjá og þannig meta, vinnu og færni einstakra nemenda, sem og framfarir þeirra miðað við fyrri tónleika.  Stefnt er að því að hver nemandi komi fram á tónleikum minnst tvisvar á vetri.

Sama gildir um samspilstónleika;  þar má meta árangur í starfi hljómsveita og annarra samspilshópa.

Skipulagðir tónleikar á vegum skólans eru sem hér segir:

  • Kammertónleikar á fyrra misseri, þar sem flutt er tónlist sem samspilshópar hafa æft undir handleiðslu ýmissa kennara.
  • Aðventutónleikar sem haldnir eru í byrjun jólaföstu.  Þar koma fram allir nemendur skólans sem læra á hljóðfæri;  yfirleitt sameinast nemendur tveggja kennara um hverja tónleika.
  • Jólatónleikar í desember sem eru venjulega haldnir í kirkju.
  • Forskólatónleikar sem haldnir eru í febrúar fyrir hvern nemendahóp í Forskóla II.   Á þessum tónleikum flytja nemendur yfirleitt tónverk sem þeir hafa sjálfir samið.  Auk þess eru öll hljóðfæri sem kennt er á í skólanum kynnt af eldri nemendum.  Það er gert í þeim tilgangi að auðvelda nemendum val á hljóðfæri til að læra á að forskóla loknum.
  • Tematónleikar á seinna misseri.  Fyrir þessa tónleika er valið ákveðið stef eða tema sem allir sameinast um.  (Dæmi:  Tónlist eftir Mozart, íslensk tónlist eða danstónlist.)
  • Blandaðir tónleikar dreifast á mánuðina mars og apríl.  Þar er ýmsum hljóðfærum blandað á efnisskrá til að tryggja fjölbreytni.  Allir nemendur skólans koma fram á þessum tónleikum.
  • Samspil nemenda á efri stigum fer stundum  fram á síðara misseri og er það aðskilið eftir hljóðfærum; sér fyrir píanónemendur, blásara og strengjaleikara.  Yfirleitt eru það nemendur í efri stigum sem koma fram.  Þetta samspil er eingöngu ætlað nemendum og kennurum.
  • Opinberir hljómsveitartónleikar eru haldnir í Háskólabíói tveimur vikum fyrir páska (á laugardegi) eða síðar.  Þar koma fram allar sveitir skólans, yngri og eldri blásarasveit, yngri og eldri strengjasveit og stórsveitin.  Blásarasveitirnar eru starfræktar í samvinnu við Tónskóla Sigursveins D. Kristinssonar.
  • Vortónleikar eru haldnir í Tónmenntaskólanum mánaðarmótin apríl – maí.  Oft er um tvenna tónleika að ræða.
  • Opinberir vortónleikar skólans eru haldnir í byrjun maí í Íslensku óperunni.  Þar koma fram yngri og eldri nemendur í einleik og samspili og er fjölbreytni höfð að leiðarljósi. Tónleikaatriðin eru síuð úr vortónleikunum sem haldnir voru í skólanum viku áður.